धादिङ । नीलकण्ठ नगरपालिका–८, ससाह ज्यामिरेका स्थानीय बासिन्दाहरूलाई विभिन्न वाद्यवादन तथा सांस्कृतिक सामग्री उपलब्ध गराइएको छ ।
स्थानीय कला र मौलिक संस्कृतिको जगेर्ना गर्ने उद्देश्यले नीलकण्ठ नगरपालिकाले पञ्चेबाजा, मादल तथा परम्परागत सांस्कृतिक भेषभुषाहरू उपलब्ध गराएको हो । यसका साथै, स्थानीय नागरिकहरूको शारीरिक तन्दुरुस्ती र स्वास्थ्यलाई ध्यानमा राख्दै व्यायामसामग्रीहरू समेत वितरण गराएको छ ।
आधुनिकताका नाममा हाम्रा रैथाने कला, संस्कृति र बाजाहरू हराउँदै जान थालेकाले त्यसको संरक्षण गर्न सामग्री सहयोग गरिएको नीलकण्ठ नगरपालिकाका नगर प्रमुख भीम प्रसाद ढुंगानाले बताउनुभयो । नयाँ पुस्तालाई आफ्नो मौलिक संस्कृतिसँग जोड्न र यसको व्यावसायिक संरक्षण गर्न सहयोग पुग्ने ढंगानाले बताउनुभयो ।
उपलब्ध गराइएका सामग्रीहरूको सही सदुपयोग गरी आफ्नो परम्परालाई जीवन्त राख्न आग्रह गर्नुभएको छ । नगरवासीको स्वास्थ्यलाई प्राथमिकतामा राखेर व्यायाम सामग्रीहरू पनि प्रदान गरिएको र आगामी दिनमा यस्ता कार्यक्रमहरूलाई थप विस्तार गरिने नगर प्रमुख ढुंगानाको भनाई छ ।
सहयोगले गाउँमा हुने विभिन्न उत्सव, चाडपर्व र सांस्कृतिक कार्यक्रमहरू सञ्चालन गर्न थप सहज हुने स्थानीयले बताएका छन् ।
