भूमिगत जलस्रोत तथा सिँचाई विकास डिभिजन सर्लाहीका डिभिजन प्रमुख र मेकानिकल अधिकृत घुससहित पक्राउ परेका छन्।

अख्तियार दुरूपयोग अनुसन्धान आयोगले डिभिजन प्रमुख सि.डि.हा.जी. अनुपमा ढकाल र मेकानिकल अधिकृत छैंठौ तुलाकान्त चौधरीलाई साढे ७ लाख घुससहित पक्राउ गरेको हो।

अख्तियार प्रवक्ता सुरेश न्यौपानेका अनुसार बोरिङ र मोटर जडान गर्ने कार्य सम्पन्न पश्चात सो कार्य वापतको रकम भुक्तानी गर्ने क्रममा दुस्ख हैरानी दिई सेवाग्राहीसँग घुसररिसवत माग गरेको भन्ने सूचना र निवेदनका आधारमा बर्दिबासस्थित अख्तियारको कार्यालयबाट टोली खटिएको थियो।

टोलीले डिभिजन प्रमुखको क्वार्टरबाटै ढकाल र चौधरीलाई ७ लाख ५० हजार घुस लिइसकेको र स्रोत नखुलेको थप ७१ हजार ११५ रूपैयाँसहित पक्राउ परेको हो।

उनीहरूबाट तीनवटा मोबाइल समेत बरामद गरिएको थियो।