धादिङ । निवृत्त शिक्षकहरूसँग रहेको ज्ञान, अनुसन्धान र अनुभवलाई नयाँ पुस्तामा हस्तान्तरण गर्दै समाज विकासमा निरन्तर सक्रिय रहनुपर्नेमा धादिङका सरोकारवालाहरूले जोड दिएका छन् ।
नेपाल निवृत्त शिक्षक समाज धादिङको १२औँ स्थापना दिवस, २६औँ निवृत्त शिक्षक दिवस, गुरु पूर्णिमा तथा व्यास जयन्तीको विशेष अवसरमा आयोजित कार्यक्रममा बोल्ने वक्ताहरूले सो कुरा बताएका हुन् ।
सोही समारोहका बिच धादिङको समग्र चिनारी, इतिहास र समसामयिक विषयवस्तु समेटिएको ‘प्रज्ञा वर्तिका’ नामक स्मारिका सार्वजनिक गरिएको छ । सम्पादन मण्डलका सदस्य रमेश अधिकारीका अनुसार स्मारिकामा शिक्षक आन्दोलन, विज्ञान, साइबर सुरक्षा, जिल्लाका ऐतिहासिक स्थल र साहित्यसम्बन्धी २० वटा फरक–फरक विषय समेटिएका छन् ।
कार्यक्रममा स्मारिका सम्पादनमा योगदान पु¥याउने डा. नवीनबन्धु पहाडी, रमेश अधिकारी, डा। मोहन कडेल, शालिग्राम अर्याल र विष्णुप्रसाद रिजाललाई कदरपत्रसहित सम्मान गरिएको छ । त्यसैगरी शैक्षिक र सामाजिक क्षेत्रमा योगदान पु¥याएबापत ज्येष्ठ निवृत्त शिक्षक कमलराज कँडेल, संविधानसभा सदस्य पुष्पविक्रम मल्ल र निवृत्त शिक्षक विष्णु भट्टराईलाई पनि विशेष सम्मान प्रदान गरिएको छ ।
