धादिङ । कक्षाकोठाको सिकाइ सुधार्न र शिक्षकको पेसागत क्षमता बढाउन धादिङका दुई विद्यालयमा सामूहिक अनुगमन गरिएको छ । शिक्षा विकास तथा समन्वय एकाइले बागेश्वरी र किराञ्चोक कार्कीडाँडा माध्यमिक विद्यालयमा पुगेर पठनपाठन र प्रशासनिक गतिविधिको निगरानी गरेको हो ।
विद्यालयमा देखिएका कमीकमजोरी औँल्याउन र सुशासन कायम गर्न यस्ता स्थलगत अनुगमन अत्यन्त प्रभावकारी हुने एकाइ प्रमुख कृष्ण कुमार श्रेष्ठले बताए । अनुगमनका क्रममा दुवै विद्यालयमा पठनपाठन नियमित रहेको, शिक्षक विद्यार्थीको उपस्थिति सन्तोषजनक पाइएको तथा अभिलेख व्यवस्थापन चुस्त रहेको पाइएको पनि उनले जानकारी दिए ।
टोलीले विद्यालयलाई अझ सुधार्नका लागि विद्यालय सुधार योजना समयमै अद्यावधिक गर्न, सिकाइ योजना बनाउन र कक्षामा शैक्षिक सामग्रीको प्रयोग बढाउन सुझाव दिएको छ । टोलीले सकारात्मक अभ्यासलाई निरन्तरता दिन र सुधार गर्नुपर्ने पक्षको प्रतिवेदन स्थानीय शिक्षा शाखामा बुझाउन निर्देशन दिएको छ ।
नियमित अनुगमनबाट विद्यालयको आन्तरिक सुशासन बलियो बन्ने, प्रशासनिक पारदर्शिता कायम हुने र शिक्षकहरू आफ्नो जिम्मेवारीप्रति थप उत्तरदायी बन्ने विश्वास गरिएको छ ।
