धादिङ । रसुवामा आएको भीषण बाढी तथा पहिरोका कारण धादिङको धुनिबेसी नगरपालिकाका ७ जना स्थानीय बासिन्दा सम्पर्कविहीन भएका छन्।
पेसाले अधिकांश सवारी चालक रहेका उनीहरू रोजगारी तथा सवारी साधन लिएर रसुवा क्षेत्रमा पुगेका बखत बाढीको चपेटामा परेको प्रारम्भिक विवरण प्राप्त भएको छ।
सम्पर्कविहीन हुनेहरूमा धुनिवेशी नगरपालिका–८ का निराजन श्रेष्ठ र राजेन्द्र श्रेष्ठ रहेका छन्। त्यस्तै, धुनिवेशी नगरपालिका–६ का राज श्रेष्ठ, किरन भुजेल, जीवन श्रेष्ठ, दशरथ डंगोल र नवराज खत्री रहेका छन्।
भोटेकोशी तथा त्रिशूली नदी तटीय क्षेत्र र रसुवाका विभिन्न स्थानमा आएको बाढी-पहिरोपछि उक्त क्षेत्रको सञ्चार सेवा अवरुद्ध हुँदा पनि उनीहरूसँग सम्पर्क हुन नसकेको हुनसक्ने अनुमान छ । बेपत्ता भएकाहरूको खोजी तथा उद्धारका लागि स्थानीय प्रशासन, नेपाल प्रहरी र सशस्त्र प्रहरी बलको टोली जुटिरहेको छ।
सम्पर्कविहीन व्यक्तिहरूको विवरण:
• निराजन श्रेष्ठ (धुनिवेशी न.पा. ८, धादिङ)
• राजेन्द्र श्रेष्ठ (धुनिवेशी न.पा. ८, धादिङ)
• राज श्रेष्ठ (धुनिवेशी न.पा. ६, धादिङ)
• किरन भुजेल (धुनिवेशी न.पा. ६, धादिङ)
• जीवन श्रेष्ठ (धुनिवेशी न.पा. ६, धादिङ)
• दशरथ डंगोल (धुनिवेशी न.पा. ६, धादिङ)
• नवराज खत्री (धुनिवेशी न.पा. ६, धादिङ)
सम्पर्कविहीन भएका परिवारजनले शीघ्र उद्धार र खोजीका लागि आग्रह गरेका छन्। स्थानीय तह र प्रहरीले उनीहरूको अवस्था पत्ता लगाउन निरन्तर प्रयास गरिरहेको जनाएको छ।
