धादिङ । धादिङको बेनिघाट रोराङ गाउँपालिकाले प्रधानमन्त्री दैवी प्रकोप उद्धार कोषमा ५ लाख १ रुपैयाँ सहायता रकम जम्मा गर्ने निर्णय गरेको छ ।
रसुवाको भोटेकोसीमा आएको बाढीका कारण देशका विभिन्न भागमा पुगेको क्षति र प्रभावितहरूको राहत तथा उद्धार कार्यमा सहयोग पुर्याउने उद्देश्यले उक्त रकम जम्मा गर्ने निर्णय गरिएको हो । योसँगै जिल्लाका १३ स्थानीय तहमध्ये प्रधानमन्त्री दैवी प्रकोप उद्धार कोषमा संस्थागत रुपमा राहत रकम जम्मा गर्ने बेनिघाट रोराङ धादिङको पहिलो पालिका बनेको छ ।
गाउँपालिकाका अध्यक्ष कृष्णबहादुर थपलिया (विवेक) द्वारा हस्ताक्षरित गृह मन्त्रालयलाई पठाइएको पत्रमा पालिकाको तर्फबाट कोषमा पाँच लाख एक रुपैयाँ सहायता रकम जम्मा गर्ने निर्णय भएको उल्लेख छ ।
आफ्नै पालिकाभित्र बाढीले ठूलो क्षति पुर्याएको कठिन परिस्थितिमा पनि बेनिघाट रोराङ गाउँपालिकाले विपद्को यस घडीमा अग्रसरता देखाउँदै केन्द्रीय उद्धार कोषमा रकम जम्मा गर्ने उदाहरणीय निर्णय गरेको छ ।
यसैगरी ज्वालामुखी गाउँपालिकाका जनप्रतिनिधिहरुले एक महिनाको पारिश्रमिक प्रधानमन्त्री दैवी प्रकोप उद्दार कोषमा जम्मा गर्ने निर्णय गरेको छ भने गाउँपालिकामा कार्यरत कर्मचारीहरुले ७ दिनको तलब बराबरको रकम कोषमा जम्मा गर्ने निर्णय गरेको छ ।
