धादिङ । बाढीका कारण प्रभावित बनेको बैरेनी अस्पतालको स्वास्थ्य सेवा निरन्तरताका लागि ५ लाख ४४ हजार रुपैयाँ बराबरको औषधि उपलब्ध गराइएको छ ।
कारितास नेपालको सहयोगमा प्रयास नेपाल धादिङले गल्छी गाउँपालिकालाई २५० भन्दा बढी प्रकारका अत्यावश्यक औषधि हस्तान्तरण गरेको हो । प्रयास नेपाल धादिङका कार्यकारी निर्देशक दामोदर अर्यालले गल्छी गाउँपालिका अध्यक्ष केदारनाथ खतिवडालाई उक्त औषधि हस्तान्तरण गर्नुभयो ।
बाढीका कारण बैरेनी अस्पतालको ग्राउन्ड फ्लोर पूर्ण रूपमा क्षतिग्रस्त हुनुका साथै भौतिक संरचना र औषधि सामग्रीमा क्षति पुगेको थियो । जसका कारण अस्पतालको दैनिक स्वास्थ्य सेवा सञ्चालनमा चुनौती थपिएको थियो ।
स्थानीय तहको अनुरोधका आधारमा विपद्को समयमा तत्काल आवश्यक सहयोग उपलब्ध गराइएको प्रयास नेपालका कार्यकारी निर्देशक अर्यालले बताउनुभयो । संस्थाले विपद् प्रभावित क्षेत्रमा स्थानीय सरकारसँगको समन्वयमा निरन्तर राहत तथा पुनरुत्थानका काम गर्दै आएको जनाएको छ।
