धादिङ । त्रिशूली नदीमा आइतबार आएको बाढीले धार परिवर्तन गर्दा धादिङको गल्छी गाउँपालिका वडा नं. ४, बेल्खुका ४८ घरपरिवार विस्थापित भएका छन् । नदीले कटान सुरु गरेपछि विस्थापितहरूलाई सुरक्षित स्थानमा सारिएको गाउँपालिका अध्यक्ष केदारनाथ खतिवडाले जानकारी दिनुभयो ।

यसैगरी, गल्छीकै चिरौँदी खोलामा आएको बाढीका कारण थप ४ घरपरिवार विस्थापित भएका छन् ।

उता पृथ्वी राजमार्गअन्तर्गत बेनीघाट रोराङ गाउँपालिका वडा नं. ७, चरौंदी (कृष्णभीर) सडक भासिएका कारण राजमार्ग पूर्ण रूपमा अवरुद्ध भएको छ ।

धादिङको गजुरी-२ मलेखुस्थित परेवाभीरमुनी त्रिशूली नदीले कटान गरेर पहिरो चल्न थालेपछि सडक बन्द गरिएको छ । पहिरोले सडक छेउमा रहेको बिजुलीको पोल बगाएको छ भने एउटा पोल सडकतर्फनै ढलेको छ ।