धादिङ । धादिङका विभिन्न स्थानमा फेला परेका २३ जनाको शव तथा शरीरका अंगको व्यवस्थापन गरिएको छ । आवश्यक कानुनी प्रक्रिया पूरा गरेर गजुरी गाउँपालिका-५, ठूलो सामुदायिक वन क्षेत्रमा व्यवस्थापन गरिएको हो ।
पहिचान हुन नसकेका शव कुहिन थालेपछि संक्रमण तथा महामारी फैलिन सक्ने जोखिमलाई समेत ध्यानमा राखेर व्यवस्थापन गरिएको जिल्ला प्रहरी कार्यालय धादिङका प्रहरी नायव उपरीक्षक प्रकाश दाहालले जानकारी दिनुभयो ।
डीएनए परीक्षणका लागि आवश्यक नमुनासमेत संकलन गरिएको छ । व्यवस्थापन गरिएकामध्ये दुईवटा सग्लो शव छन् भने २१ वटा शरीरका विभिन्न अंग रहेका छन् । प्रत्येक शव तथा अंगलाई पहिचान गर्न सहज हुने गरी छुट्टाछुट्टै नम्बर दिइएको छ । शवलाई छुट्टाछुट्टै खाडलमा राखेर व्यवस्थापन गरिएको प्रहरीले जनाएको छ ।
डीएनए परीक्षणबाट कुनै शवको पहिचान खुलेमा सम्बन्धित परिवारलाई जानकारी गराइनेछ । धादिङका विभिन्न स्थानबाट संकलन भएका शवमध्ये यसअघि २७ वटा पोखरा र ६ वटा काठमाडौं पठाएर व्यवस्थापन गरिएको थियो ।
