धादिङ । गोसाइकुण्ड जाने क्रममा भोटेकोसीको बाढीमा परेर बेपत्ता भएका धादिङका १० जनाको शव पहिचान भएको छ ।
एउटै बसमा रहेका २६ जना मध्ये नीलकण्ठ नगरपालिका–१२ का दयाराम लम्साल, सीता लम्साल, प्रकाश लम्साल, इन्दिरा अर्याल लम्साल, रामचन्द्र खनाल र नीलकण्ठ–९ का गायत्री लम्सालको शव पहिचान भएको हो ।
गायत्री लम्सालको शव सोमबार पहिचानपछि धादिङबेसीस्थित आँसीखोला दोभानमा अन्तिम दाहसंस्कार गरिएको हो भने अन्य पाँच जनाको बुधबार टिचिङ अस्पताल काठमाण्डौमा शव पहिचानपछि पशुपति आर्यघाटमा अन्तिम दाहसंस्कार गर्ने तयारी भएको टिचिङ अस्पतालबाट हाम्रा सहकर्मी मनिष दुवाडीले जानकारी दिनुभयो ।
त्यसैगरी बाढीपछि सम्पर्कविहीन रहेका सिद्दलेकका हरीप्रसाद सिलवाल र विन्दा देवी सिलवाल, घनश्याम भट्ट र कल्पना भट्ट दनैको शव पनि टिचिङ अस्पतालबाटै पहिचान भएको छ ।
पारिवारिक श्रोतका अनुसार सिद्दलेकका हरीप्रसाद र विन्दादेवीको शव आजै च्याडुदोभानमा अन्तिम दाहसंस्कार गरिने तयारी भएको छ भने घनश्याम र कल्पनाको भने काठमाण्डौस्थित पशुपति आर्यघाटमा दाहसंस्कार गर्ने तयारी भएको छ ।
