धादिङ । भोटेकोशीको बाढीमा बससहित बेपत्ता भएका २६ जनाको परिवारलाई नेकपा एमालेले समवेदना व्यक्त गरेको छ ।
धादिङबाट रसुवाको गोसाइँकुण्ड जाने क्रममा भदौ १० गते धादिङको नीलकण्ठ र सिद्दलेकका १२ जोडी दम्पतीसहित २६ जना बेपत्ता भएका थिए । लामो समयसम्म खोजी गर्दा पनि फेला नपरेपछि फर्किने आशा बाँकी नरहेकाले परिवारजनले कुशको शव बनाएर दाहसंस्कार गरी काजक्रिया सुरु गरेका छन् ।
यसै क्रममा नेकपा एमाले धादिङका पदाधिकारी, सांसद तथा केन्द्रीय सदस्यहरूसहितका नेताहरू पीडित परिवारको घरमै पुगेर शोक प्रकट गरेका हुन् । बाढीमा परी निधनहरु भएकाहरुमा दयाराम लम्साल र छविलाल श्रेष्ठ नेकपा एमालेका जिल्ला कमिटि सदस्य हुन् । नारायण लम्साल जिल्ला कमिटिका सल्लाहकार र रामचन्द्र खनाल नीलकण्ठ नगरकमिटिका सदस्य हुन् । घटनामा परेका अधिकांश नेकपा एमालेका पार्टी सदस्य छन् ।
घटनाले धादिङका धेरै गाउँ शोकमा डुबेको छ । शोकसन्तप्त परिवारमा धैर्य धारण गर्ने शक्ति मिलोस् भन्दै नेकपा एमालेले दिवङ्गत आत्माको चिरशान्तिको कामना गरेको छ ।
