धादिङ । बाढीका कारण क्षतिग्रस्त पृथ्वी राजमार्गअन्तर्गत गजुरी गाउँपालिका-२ स्थित परेवाभिरमा सडक मर्मतको काम नसकिएपछि सवारी आवागमन थप एक दिन बन्द गरिने भएको छ।

जिल्ला प्रशासन कार्यालय धादिङले एक सूचना जारी गर्दै २१ गते आइतबार बिहान ६ बजेदेखि बेलुका ६ बजेसम्म परेवाभिर हुँदै चल्ने एम्बुलेन्स र शववाहनबाहेक सम्पूर्ण सवारीसाधनको आवागमन रोक लगाइने जनाएको छ।

यसअघि शनिबार बिहान ६ बजेदेखि बेलुका ६ बजेसम्म सडक बन्द गरी मर्मत कार्य गरिएको थियो। तर, काम पूरा नभएपछि थप एक दिन आवागमन बन्द गरिएको प्रशासनले जनाएको छ।

प्रशासनले उक्त अवधिमा यात्रुलाई वैकल्पिक सडक प्रयोग गरी यात्रा गर्न अनुरोध गरेको छ।