धादिङ । त्रिशूली नदी वारपार गर्न तत्काल वेलिबृजको माग गर्दै धादिङका नागरिकहरुले सरकारलाई दवाद दिन थालेका छन् । बाढीले निम्त्याएको सङ्कट समाधानका लागि धादिङबासीहरूले सामाजिक सञ्जालबाटै सरकारलाई दबाब दिन थालेका हुन् ।

छिटो भन्दा छिटो स्थायी पुल निर्माण र तत्कालका लागि वैकल्पिक पुलको व्यवस्था गर्न माग गर्दै फेसबुकमा ‘#ConnectDhading’ अभियान तीव्र पारिएको छ । आइतबारदेखि सुरु भएको यो अभियान छोटो समयमै व्यापक बनेको छ ।

फेसबुकले यो ह्यासट्यागलाई ट्रेन्डिङमा देखाउन थालेको छ । नागरिकस्तरबाट उठेको यो दबाबले सम्बद्ध निकायको ध्यान खिचेको छ । स्थानीयहरूले तत्काल बेलिब्रिज जडान गरी यातायात सहज बनाउन र पक्की पुलको काम अघि बढाउन माग गरिरहेका छन् ।

भोटेकोसीको बाढीले राष्ट्रिय राजमार्गसँग धादिङबेसी जोड्ने त्रिशूली नदीमाथिको मुख्य पुल बगाएपछि यातायात ठप्प छ । दैनिक आवतजावत र उपभोग्य वस्तुको आपूर्ति पूर्ण रूपमा प्रभावित बनेको छ ।