स्ट्रेट अफ हर्मुजमा अमेरिका र इरानबीच युद्ध सुरू भएयताकै ठूलो आक्रमण भएको छ।
विश्वभर आपूर्ति हुने कच्चा तेल र प्राकृतिक ग्यासको २५ प्रतिशत पैठारी हुने हर्मुजमा अमेरिका र इरान दुवैले एक-अर्काका पानीजहाजमा आक्रमण गरेकाले त्यहाँ ६ महिना यताकै ठूलो तनाव देखिएको अन्तर्राष्ट्रिय समाचार संस्था रोयटर्सले जनाएको छ।
अमेरिकाले इरानका पाँच वटा तेल ट्यांकरमा हमला गरेको थियो।
त्यसको जबाफमा इरानले अमेरिका र अरू देशका गरी १० वटा तेल ट्यांकरमा पछिल्लो एक साता यता नै हमला गरेको भनेर रोयटर्सले लेखेको छ।
यसलाई युद्ध सुरू भएको ६ महिनापछि दुवै पक्षबाट समुद्री यातायातलाई लक्ष्य गरी भएको सबैभन्दा ठूलो आक्रमणको शृंखला भनिएको छ।
आक्रमणपछि अन्तर्राष्ट्रिय बजारमा कच्चा तेलको मूल्य तीव्र रूपमा बढेको छ।
ब्रेन्ट कच्चा तेलको मूल्य प्रतिब्यारेल १०० डलर नाघेको छ। गत जुलाईपछि पहिलोपटक ब्रेन्टको मूल्य १०० डलरमाथि पुगेको हो।
समुद्री यातायातमा भएको आक्रमणका क्रममा कम्तीमा एक जना चालक दलका सदस्यको मृत्यु भएको पनि रोयटर्सले लेखेको छ। अर्का एक जना भने बेपत्ता छन्।
अमेरिकी सेनाले पाँचवटा इरानी तेल ट्यांकर नष्ट गरेको भिडियोसमेत सार्वजनिक गरेको छ।
