धादिङ । कृष्णभीरमा सडक अवरुद्ध बनेर वैकल्पिक सडकका रुपमा प्रयोग भइरहेको त्रिभुवन राजपथ पनि पहिरोका कारण गयरातीदेखि अवरुद्ध बनेको छ । गएराति ९ बजे धादिङको थाक्रे गाउँपालिका–७ सोप्याङखोलामा पहिरो खसेका कारण काठमाडौंबाट नौबिसे हुँदै –हेटौंडा जाने त्रिभुवन राजपथ ठप्प बनेको हो ।

प्रहरीका अनुसार पहिरो निरन्तर झरी रहेका कारण पन्छाउन समस्या भएको छ । बिहीबार बिहानैदेखि ४ वटा उपकरण प्रयोग गरेर पहिरो पन्छाउने काम भइरहेको छ ।

कृष्णभिरमा बाढीका कारण सडक भासिएपछि पृथ्वीराजमार्ग अवरुद्ध छ । पृथ्वीराजमार्ग बन्द भएपछि काठमाडौं भित्रिने र बाहिरिने सवारीसाधनहरूले हेटौंडा–काठमाडौं जोड्ने वैकल्पिक राजमार्गहरू प्रयोग गर्दै आइरहेका छन् । जसका कारण हेटौंडा–काठमाडौंका तीन रुटमा सवारीसाधनहरूको ठूलो चाप छ ।