धादिङ । भदौ १० गतेको बिनासकारी बाढीले त्रिशूली नदी माथीको पाँच वटा पक्की पुल बगायो । अधिकाँंश झोलुङ्गे पुल बाढीले लग्यो । सदरमुकाम धादिङबेसीसहित सात वटा पालिका देशको लाइफलाइन पृथ्वी राजमार्गसँग सम्पर्क विच्छेद छ । धादिङबेसी–मलेखु सडक अर्थात कालुपाण्डे मार्ग भदौ १० गतेदेखि नै ठप्प छ । बाढीको वितण्डाले पुलहरु बगाएपछि सिङ्गो जिल्ला सडकसम्पर्कबाट बाहिर छ ।
बर्खामासको उर्लदो त्रिशूली वारपार गर्न दुई वटा झोलुङ्गे पुल बाँकी छ । सिद्धलेक–६ र गजुरी–२ जोड्ने विहानी पम्प नजिकैको पुल, तथा सिद्धलेक–६ र बेनीघाट–३ जोड्ने मलेखुको अर्को पुल । यतिबेला विहानी पम्प नजिकैको झोलुङ्गे पुल नागरिकका लागि बाँच्ने र बचाउने अन्तिम सहारा बनेको छ । बिहानदेखि बेलुकासम्म पुल व्यस्त छ । पुलमा देखिने खचाखच भीड र सास्तीले जोकोहीको छाती चर्काउँछ ।
किसानले वर्षभरि पसिना बगाएर फलाएको तरकारी यही पुलबाट जोखिम मोलेर तार्नु परेको छ । उता, मरणान्त अवस्थाका बिरामीलाई स्टेचरमा बोकेर जोखमपूर्ण तरिकाले त्रिशूली तारिरहेको कारुणिक दृश्य छिनछिनमा दोहोरिन्छ । वारी एउटा र पारी अर्काे एम्बुलेन्स् प्रयोग गर्नु अहिलेको बाध्यता हो ।
आफैँमा जीर्ण र जोखिमपूर्ण बनेको यो पुलबाटै खाद्यान्न, बिरामी, मोटरसाइकल र सर्वसाधारणको ओहोदोहोर चलिरहेको छ । जहाँ हरेक पाइलामा त्रास छ, तर जीवन धान्न त्यही सास्ती भोग्नुको विकल्प छैन ।
तस्बिरहरु : शंकर श्रेष्ठ
