ललितपुर। रसुवा–भोटेकोशी विपद् प्रभावित नागरिकलाई मनोसामाजिक परामर्श उपलब्ध गराउन नेपाली कांग्रेसले जनशक्ति तयार गरेको छ ।

कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा बुधबार पार्टी केन्द्रीय कार्यालय सानेपामा मनोसामाजिक परामर्शसम्बन्धी सम्पन्न प्रशिक्षणमा विभिन्न क्षेत्रका ४६ जना सहभागी रहेको कार्यवाहक मुख्य सचिव कृष्णप्रसाद दुलालले जानकारी दिनुभयो ।

उहाँहरुले विपद्बाट विस्थापित परिवार रहेका आश्रयस्थलमा पुगेर प्रभावित नागरिकलाई मनोसामाजिक परामर्श उपलब्ध गराउने कार्यवाहक मुख्यसचिव दुलालले जानकारी दिनुभयो ।

प्रशिक्षणका क्रममा बाढी प्रभावित नागरिकले भोगिरहेका विभिन्न मानसिक तनाव तथा समस्याबारे छलफल गरिएको थियो । त्यस अवसरमा सहभागीले बालबालिका, गर्भवती, अपाङ्गता भएका व्यक्ति तथा ज्येष्ठ नागरिक प्राकृतिक विपत्तिका कारण मानसिक रूपमा बढी प्रभावित र जोखिममा रहेको बताउनुभएको थियो ।

प्रशिक्षणमा डा प्रभाकर पोखरेल, डा रविन बस्नेत तथा मनोविद् कपिल शर्मा, गृष्मा पनेरु र प्रकाश लामिछानेले सहजीकरण गर्नुभएको थियोे ।

कांग्रेसले विपद्पीडित नागरिकलाई तत्काल राहतसँगै मानसिक तथा मनोसामाजिक सहयोग पनि आवश्यक रहेको भन्दै प्रशिक्षित जनशक्तिलाई प्रभावित क्षेत्र र आश्रयस्थलमा परिचालन गर्ने यसअघि नै जनाएको थियो ।