धादिङ । पृथ्वी राजमार्गअन्तर्गत धादिङको गजुरी गाउँपालिका–६ जहरेखेत पुलनजिक शुक्रबार बिहान बस र ट्रक आपसमा ठोक्किँदा चार जना घाइते भएका छन्। काठमाडौँबाट धादिङबेँसीतर्फ आउँदै गरेको बा ४ ख ८६६७ नम्बरको यात्रुवाहक बस र विपरीत दिशाबाट जाँदै गरेको ना ५ ख ७४१४ नम्बरको ट्रक एकआपसमा ठोक्किएका हुन्।
दुर्घटनामा ज्वालामुखी गाउँपालिका–२, धादिङकी ८० वर्षीया दिवाकुमारी दानी र सोही ठाउँकी ५० वर्षीया धनकुमारी केसी घाइते भएका छन्। यसैगरी, बसका सहचालक गल्छी गाउँपालिका–१ का १७ वर्षीय रामचन्द्र परियारको बायाँ आँखामा र बस चालक नुवाकोटको विदुर नगरपालिका–७ का ३३ वर्षीय समियाल तामाङको दुवै खुट्टा र कम्मरमा चोट लागेको छ। घाइतेहरूको स्थानीय स्वास्थ्य संस्थामा उपचार भइरहेको छ।
दुर्घटनाका कारण बस र ट्रकको अघिल्लो भागमा पूर्ण रूपमा क्षति पुगेको छ भने दुर्घटनापछि पृथ्वी राजमार्ग एकतर्फी रूपमा मात्र सञ्चालन भइरहेको छ। घटनाबारे थप अनुसन्धान अघि बढाउन प्रहरीले ट्रक चालक चितवनको भरतपुर महानगरपालिका–२९ का करिब ३५ वर्षीय कमल देवकोटालाई नियन्त्रणमा लिएको छ।
