धादिङ । रसुवाको भोटेकोशी नदी हुँदै त्रिशुली नदीमा आएको बाढीले बगाएको सुनका गरगहना घरमा लुकाएर राख्ने एक व्यक्ति धादिङबाट पक्राउ परेका छन् ।
बाढीले बगाएर ल्याएका सुन तथा चाँदीका गरगहनाहरू धादिङको गजुरी गाउँपालिका–६ बन्छेटार बस्ने अन्दाजी ३५ वर्षीय रामबहादुर तामाङले भदौ ११ गते फेला पारेका थिए ।
गरगहना फेला पारे पनि तामाङले कसैलाई जानकारी नगराई नियतबस आफ्नो घरमा लुकाएर राखेको भन्ने सूचनाको आधारमा <span;>अस्थायी प्रहरी पोष्ट आदमघाटबाट खटिएको प्रहरी टोलीले भदौ २६ गते तामाङलाई गरगहना सहित नियन्त्रणमा लिएको हो ।
पक्राउ परेका तामाङको साथबाट सुन जस्तो पहेँलो धातुको बाला ३ टुक्रा, झुम्का २ थान, सिक्री २ थान, औठी २ थान, रातो पोतेमा जडित मंगलसूत्र २ थान र सेतो धातुको जस्तो देखिने पाउजु २ जोर बरामद गरेको छ ।
बरामद गरिएका सबै गरगहना रीतपूर्वक नियन्त्रणमा लिइएको जिल्ला प्रहरी कार्यालय धादिङका प्रवक्ता तथा सूचना अधिकारी प्रहरी नायव उपरीक्षक प्रकाश दाहालले जानकारी दिनुभयो । पक्राउ परेका रामबहादुर तामाङमाथि चोरीसम्बन्धी मुद्दामा इलाका प्रहरी कार्यालय गजुरीबाट थप अनुसन्धान भइरहेको प्रहरीले जनाएको छ ।
