धादिङ । भदौ १० गतेको बाढीबाट प्रभावित गजुरी गाउँपालिका–५, गलौदी क्षेत्रमा सरसफाइ तथा पुनःस्थापनाको काम तिब्र पारिएको छ । बाढीले घरभित्र र वरपर थुपारेको लेदो, बालुवा तथा फोहोरजन्य सामग्री हटाउन सुरु गरिएको हो ।
घरभित्र तथा वरपर थुप्रिएको बाक्लो लेदो र पागो हातले मात्र पन्छाउन नसक्ने अवस्थालाई मध्यनजर गर्दै सेभ द चिल्ड्रेनको आर्थिक सहयोग र गजुरी गाउँपालिकासँगको समन्वयमा सरसफाइ कार्य अगाडि बढाएको फोकस नेपाल धादिङका कार्यकारी निर्देशक एकराज छत्कुलीले जानकारी दिनुभयो ।
अभियानअन्तर्गत गलौदीको सरसफाइमा दुईवटा डोजर र दुईवटा टिपर परिचालन गरी लेदो र बालुवा हटाउने काम भइरहेको छ । केही घरधनीले आफ्नै प्रयासमा सफाइ थालेपनि सरसफाइमा कठिनाई उत्पन्न भएकोले गाउँपालिकाकै समन्वयमा डोजर प्रयोग गरिएको हो । सरसफाइ अभियानसँगै बाढी प्रभावित क्षेत्रलाई पुनः स्वच्छ, सुरक्षित र व्यवस्थित बनाउन र स्थानीयलाई सामान्य दैनिकीमा फर्काउन सहयोग पुग्नेछ ।
