धादिङ । गल्छी गाउँपालिकाका कृषकहरुलाई उन्नत जातका बोयर बोका वितरण गरिएको छ । बाख्रापालन प्रवद्र्धन विशेष सहयोग कार्यक्रमअन्तर्गत गल्छी गाउँपालिकाभित्रका १३ वटा कृषक समूहलाई प्रतिसमूह २ वटाका दरले बोका वितरण गरिएको हो ।
खाद्य तथा पोषण सुरक्षा सुधार आयोजना, आयोजना क्लस्टर इकाइ गोरखाको आर्थिक तथा प्राविधिक सहयोगमा वितरण गरिएको बोकाको विमा समेत गराइएको छ । कृषकहरूको जोखिम न्यूनीकरणका लागि सबै बोकाको बीमा गराइएको आयोजनाका पशु सेवा प्राविधिक विष्णुकुमार श्रेष्ठले जानकारी दिनुभयो ।
वितरण कार्यक्रममा गल्छी गाउँपालिकाका अध्यक्ष, उपाध्यक्ष, पशु सेवा शाखा प्रमुख, फानसेप क्लस्टर इकाइ गोरखाका २ जना कृषि अधिकृत, पशुपालन उत्पादन विज्ञ तथा पशु सेवा प्राविधिकहरू सहभागी थिए । बाख्राको मासु उत्पादनमा वृद्धि गर्नुका साथै नश्ल सुधार गरी हाडनाताबीचको पशु प्रजनन हटाउने मुख्य उद्देश्यले बोयर बोका वितरण गरिएको पनि श्रेष्ठले जानकारी दिनुभयो ।
