धादिङ । नेपाली कांग्रेसको १५औँ महाधिवेशनको प्रक्रिया सुरु भएसँगै धादिङ कांग्रेसमा जिल्ला नेतृत्वका लागि शक्ति–संघर्ष तीव्र बनेको छ ।
वर्तमान जिल्ला सभापति रामनाथ अधिकारीविरुद्ध विशेष महाधिवेशनबाट केन्द्रीय सदस्यको जिम्मेवारीमा पुगेका रमेश धमलाले शेरबहादुर देउवा निकट नेताहरूसँग मिलेर नयाँ समीकरण बनाउन थालेको चर्चा छ । नेता शेखर कोइराला निकट रहेका अधिकारीले विशेष महाधिवेशनबाट आएको कार्यसमितिलाई निर्वाचन आयोगले वैधता दिएसँगै पार्टीको मूल प्रवाहमा रहेर काम गरेका छन् ।
विगतमा एउटै समूहमा बसेर काम गरेका अधिकारी र धमलाबीच २०७९ को निर्वाचनदेखि मनमुटाव बढेको थियो । जिल्ला सभापति अधिकारीले नै त्यतिबेला टिकट पाएपछि धमलाले विद्रोही उम्मेदवारी दिएका थिए । र, वर्तमान सभापति गगनकुमार थापासहितका नेताहरूले पछि उनको उम्मेदवारी फिर्ता गराए पनि दुई नेताबीचमा सम्बन्ध सुमधुर हुन सकेको थिएन ।
एकअर्काविरुद्ध प्रतिशोध लिने रणनीतिसहित धमलाले केन्द्रीय नीति विपरीत गएर जिल्लामा समीकरण बनाउँदै अधिकारीविरुद्ध घेराबन्दीको रणनीति गरेका हुन् । नेतृत्व हस्तान्तरण र पुस्तान्तरण भन्दै विशेष महाधिवेशनमा सहभागी धमला अहिले विगतमा पटक–पटक जिल्ला नेतृत्वमा पराजित भीमप्रसाद ढुंगानालाई नेतृत्वमा बोकेर अघि बढेका छन् ।
आफू निकट युवा पुस्ताका नेतालाई पनि विश्वास नगरेका धमलाले २०४८ सालदेखि निरन्तर स्थानीय तहको नेतृत्वमा बसेका पुराना र प्रभाव घट्दै गएका व्यक्तिलाई बोक्न थालेपछि निकटहरू पनि धमलासँग रुष्ट देखिएका छन् । दिलमान पाख्रिनको भूमिकालाई समेत जोडेर विभिन्न राजनीतिक समीकरणबारे चर्चा हुन थालेको भए पनि उनको औपचारिक धारणा र आगामी रणनीति स्पष्ट भइसकेको छैन ।
२०७८ सालमा सम्पन्न कांग्रेसको १४औँ जिल्ला अधिवेशनमा अधिकारीले ढुंगानालाई ३६ मतले पराजित गरेका थिए । अधिकारीले १ हजार ८२ मत प्राप्त गर्दा ढुंगानाले १ हजार ४६ मत पाएका थिए । त्यसबेला अधिकारीलाई रामचन्द्र पौडेल पक्ष र ढुंगानालाई शेरबहादुर देउवा पक्षको समर्थन थियो । त्यस निर्वाचनले धादिङ कांग्रेसमा दुई राजनीतिक धारबीचको प्रतिस्पर्धा देखाएको थियो । अहिले भने विगतमा फरक समूहमा रहेका नेताहरूबीच सहकार्यको सम्भावनाले पुरानो समीकरण कायम रहने वा नयाँ शक्ति–संरचना बन्ने भन्ने प्रश्न उठेको छ ।
पुरानो सहकार्यमा दूरी, नयाँ बन्ने सम्भावना
धादिङ कांग्रेसमा अधिकारी र धमलाबीचको राजनीतिक सहकार्यलाई विगतमा महत्वपूर्ण मानिँदै आएको थियो । धमला २०७२ सालमा जिल्ला सभापति बनेका थिए भने २०७८ को अधिवेशनसम्म अधिकारीको पक्षमा थिए ।
तर २०७९ सालको प्रतिनिधिसभा निर्वाचनका क्रममा देखिएको उम्मेदवारीसम्बन्धी विवादपछि उनीहरूबीच राजनीतिक दूरी बढेको चर्चा कांग्रेस वृत्तमा हुँदै आएको छ । विशेष महाधिवेशनपछि अधिकारी र धमलाको राजनीतिक भूमिकालाई लिएर पनि फरक व्याख्या हुने गरेको छ ।
विशेष महाधिवेशनको प्रक्रियामा फरक धारमा रहेका नेताहरूबीच अहिले संवाद र सहकार्यको सम्भावना देखिनुले आगामी जिल्ला अधिवेशनको प्रतिस्पर्धालाई थप जटिल बनाउन सक्ने देखिन्छ । यद्यपि, ढुंगाना, धमला र पाख्रिनबीच औपचारिक गठबन्धन बनेको पुष्टि भइसकेको छैन ।
अधिकारीका लागि नेतृत्व निरन्तरताको चुनौती
जिल्ला सभापति अधिकारीका लागि आगामी अधिवेशन नेतृत्वको निरन्तरता कायम गर्ने अवसरसँगै संगठनभित्र आफ्नो आधार जोगाउने चुनौती पनि हुनेछ । विगतको अधिवेशनमा ढुंगानामाथि प्राप्त जितले अधिकारीलाई जिल्ला नेतृत्वमा स्थापित गरेको थियो ।
तर, त्यसबेलाको मतपरिणामलाई आगामी अधिवेशनको शक्ति–सन्तुलनको निश्चित आधार मान्न सकिँदैन । वडा, पालिका र क्षेत्रीय अधिवेशनमा प्रतिनिधि चयनको परिणामले नै नेतृत्वको प्रतिस्पर्धालाई प्रभावित गर्नेछ । अधिकारीको पक्षमा रहेका नेताहरूको संगठनात्मक सक्रियता, कार्यकर्तासँगको सम्बन्ध र आगामी अधिवेशनमा बन्ने सहकार्यले उनको राजनीतिक आधार कस्तो रहन्छ भन्ने निर्धारण गर्नेछ ।
