धादिङ । कृष्णभीरसहित पृथ्वी राजमार्गमा ७ ठाउँमा पहिरोले सडक अवरुद्ध बनेपछि पृथ्वी राजमार्ग ठप्प बनेको छ ।
भदौ १० गतेको बाढीले कटान गरेर भासिएपछी नयाँ डाइभर्सन बनाएर सडक संचालन गरिएको कृष्णभीरमा फेरि सडक अवरुद्ध बनेको छ ।
नयाँ डाईभर्सनलाई टेकोको रुपमा रहेको ग्याबिन जाली त्रिशूली नदी पट्टीको पहिरोले तानेको छ । डाईभर्सन भन्दा माथिल्लो भागबाट पनि लेदो झरिरहेको छ । कृष्णभीरमा हाल सवारी संचालन गर्न सकिने अवस्था नरहेको र वर्षात नरोकिए कोले पहिरोको जोखिम थप बढेको वेनिघाट रोराङ ७ का वडा अध्यक्ष कुमार बस्नेतले जानकारी दिनुभयो ।
कृष्णभीरसहित सात ठाउँमा गएराति ढुंगासहितको पहिरो खसेकाले राजमार्ग पूर्णरुपमा अवरुद्ध भएको जिल्ला प्रहरी कार्यालय धादिङले जानकारी दिएको छ ।
बिहीबार साँझदेखि रातभर आवतजावतमा रोक लगाइएको पृथ्वीराजमार्गमा शुक्रबार बिहान ५ बजेदेखि गाडी सञ्चालन गर्न दिने तयारी स्थानीय प्रशासनको थियो ।
तर, अब यो राजमार्ग अनिश्चित कालको लागि बन्द भएको प्रहरीले जनाएको छ । प्रहरीकाअनुसार पहिरो पन्छाउने प्रयास भैरहेपनि निरन्तरको वर्षाका कारण समस्या भएको छ।
