धादिङ । नेपाली कांग्रेस धादिङका सहसचिव नवराज तिमल्सिनाले धादिङ प्रतिनिधि सभा क्षेत्र नं. २, को सभापतिमा उम्मेदवारी घोषणा गरेका छन् ।
पार्टी संगठनमा लामो समयदेखि सक्रिय रहँदै आएका तिमिल्सिनाले अहिले युवा पुस्ताको प्रतिनिधित्व गर्दै क्षेत्रीय सभापतिमा उम्मेदवारी अघि सारेका हुन् ।
विद्यालय समयदेखि नै नेपाल विद्यार्थी संघमा आबद्ध भएर राजनीतिक तथा संगठनात्मक यात्रा सुरु गरेका तिमल्सिनाले अचने माध्यमिक विद्यालयको नेविसंघ इकाई अध्यक्ष हुँदै नेविसंघको क्षेत्रीय अध्यक्ष, जिल्ला सदस्य र केन्द्रीय प्रतिनिधिको जिम्मेवारी सम्हालेका छन् ।
त्यसपछि नेपाली कांग्रेस धादिङको जिल्ला सदस्य हुँदै जिल्ला सहसचिवको जिम्मेवारीमा पुगेका तिमिल्सिनाले नेपाल सरकारको कृषि तथा पशुपन्छी विकास मन्त्रालयमा पूर्वमन्त्री रामनाथ अधिकारीको सचिवालय प्रमुखका रूपमा समेत कार्यसम्पादन गरेका थिए ।
नेपाली कांग्रेसको १५औँ महाधिवेशनअन्तर्गत धादिङ क्षेत्र नं. २ को क्षेत्रीय अधिवेशन आजबाट सुरु भएको छ । करिब १ हजार ७ सय प्रतिनिधि सहभागी हुने अधिवेशनको मतदान भने भोली असोज १३ गते हुने कार्यतालिका छ ।
