धादिङ । नियमित महाधिवेशन पक्षधर कांग्रेसले १५औँ महाधिवेशन अन्तर्गत धादिङ जिल्लामा नियमित वडा अधिवेशनको तयारी तीव्र पारेको छ ।
नेपाली कांग्रेसको विशेष महाधिवेशनबाट आएको नेतृत्वका अदालतले आधिकारिकता दिएपनि विशेषमहाधिवेशन स्वीकार नगरेका कांग्रेस नेता शेरबहादुर देउवा पक्षका कांग्रेसहरुले छुट्टै अधिवेशनको तयारी थालेको हो ।
१५औं जिल्ला महाधिवेशन तयारी समितिले आज धादिङबेसीमा पत्रकार सम्मेलन गर्दै जिल्लामा अधिवेशनका मितिहरू सार्वजनिक गरेका छन् ।
घोषित कार्यतालिका अनुसार धादिङ जिल्लाका वडा अधिवेशनहरू आउँदो असोज १५ गतेबाट सुरु हुने भएको छ । त्यस्तै, प्रदेशसभा क्षेत्रीय अधिवेशन असोज २३ गते, जिल्ला अधिवेशन कात्तिक १५ गते र प्रदेश अधिवेशन मङ्सिर ४ गते हुने तय गरिएको छ ।
यसैगरी, पार्टीको केन्द्रीय महाधिवेशन आगामी मङ्सिर २१, २२ र २३ गते काठमाडौँमा सम्पन्न हुने कार्यतालिका रहेको धादिङ जिल्ला संयोजक गोपाल विश्वकर्माले जानकारी दिए ।
