धादिङ । नेपाली काँग्रेसको शेरबहादुर देउवा पक्ष ९नियमित महाधिवेशन पक्षधर०ले धादिङबेसीमा १५औँ जिल्ला अधिवेशन तयारी समितिको कार्यालय सञ्चालनमा ल्याएको छ ।
मंगलबार आयोजित एक कार्यक्रमका बीच १५औँ केन्द्रीय महाधिवेशन तयारी समितिका केन्द्रीय प्रतिनिधि धर्मराज अर्यालले सो कार्यालयको उद्घाटन गर्नुभएको हो । उद्घाटन कार्यक्रमलाई सम्बोधन गर्दै अर्यालले चुनाव चिन्ह रुख र चारतारे झण्डा आफूहरूकै पक्षमा रहने दाबी गर्दै कार्यकर्तालाई ढुक्क भएर अधिवेशनमा जुट्न आग्रह गर्नुभयो । उहाँले अधिवेशनले पार्टीलाई थप एकताबद्ध बनाउने र बाटो विराएका नेता-कार्यकर्ताहरू पनि मूलधारमै फर्किने विश्वास व्यक्त गर्नुभयो ।
कार्यक्रममा बागमती प्रदेशसभा सदस्य गोविन्द लम्सालले पार्टीभित्र विधान र पद्धतिको सर्वोच्चता कायम गर्दै क्रियाशील सदस्यताको सुरक्षालाई प्राथमिकता दिनुपर्नेमा जोड दिनुभयो । त्यसैगरी जिल्ला संयोजक गोपाल विश्वकर्माले भौतिक कब्जा राजनीति र कानुनी आधार नभएको उल्लेख गर्दै सर्वोच्च अदालतको पूर्ण इजलासबाट न्यायको सुनिश्चिततासहित काँग्रेस अगाडि बढेको स्पष्ट पार्नुभयो । सोही अवसरमा केन्द्रीय प्रतिनिधि अर्यालले संयोजक विश्वकर्मालाई केन्द्रबाट प्राप्त मनोनयन पत्र हस्तान्तरण गर्नुभएको थियो ।
देउवा पक्षले वैधानिकता र विधानको विषयलाई प्रमुख मुद्दा बनाउँदै अधिवेशनको नयाँ कार्यतालिका समेत सार्वजनिक गरेको छ । संयोजक विश्वकर्माका अनुसार असोज १५ गते वडा, असोज २० गते पालिका, असोज २३ गते क्षेत्रीय तथा प्रदेश र कात्तिक १५ गते जिल्ला अधिवेशन गर्ने तयारी गरिएको छ । त्यसैगरी प्रदेश अधिवेशन आगामी मङ्सिर ४ गते र केन्द्रीय महाधिवेशन मङ्सिर २१, २२ र २३ गते सम्पन्न गर्ने तालिका तय गरिएको छ ।
