धादिङ । पूर्व संचारमन्त्री एवं राष्ट्रिय स्वतन्त्र पार्टी (रास्वपा) का सांसद जगदिश खरेलले विदेशमा रहेका नेपालीलाई मतदानको अधिकार दिलाउने कुरामा आफुहरु दृढ रहेको बताएका छन् ।
रास्वपाले चलाएको ‘हामी आउँदैछौं’ अभियानको क्रममा धादिङ आएका खरेलले प्रवासमा रहेका नेपालीहरूलाई मताधिकार दिलाउन आफूहरू दृढ रहेको बताएका हुन् ।
विदेशमा बसोबास गरिरहेका नेपालीहरू पनि देशकै अभिन्न हिस्सा भएको र उनीहरूलाई नागरिकताको अधिकार, लगानीको अधिकार तथा भोट हाल्ने अधिकार उपलब्ध गराउने कुरामा राष्ट्रिय स्वतन्त्र पार्टी दृढताका साथ उभिने खरेलले उल्लेख गरे ।
सरकारले गरिरहेको गतिविधिबारे बोल्दै पूर्व संचारमन्त्री खरेलले सरकारले पछिल्लो छ महिनाको अवधिमा सुशासन र विकासका निम्ति आशातीत आधारशिला निर्माण गरेको दाबी गरे ।
अबका दिनमा सरकार द्रुत गतिमा अगाडि बढ्ने, संसद र पार्टीले जनतालाई कुनै पनि धोका नदिने तथा जनताका सपनाहरूलाई साकार पार्ने बाटोमा निरन्तर अघि बढ्ने प्रतिबद्धता समेत व्यक्त गरेका छन् ।
