काठमाडौ । काठमाडौमा जारी नेपाली काँग्रेसको १५औँ महाधिवेशनमा धादिङ जिल्लाबाट ३ सहमहामन्त्रीसहित १२ जना चुनावी मैदानमा उत्रिएका छन् ।
अब बन्ने नयाँ कार्यसमितिको सहमहामन्त्रीमा दिलमान पाख्रिन, रमेश धमला र बाबुकृष्ण सापकोटा उम्मेदवार छन् । केन्द्रीय सदस्यमा भीमप्रसाद ढुङ्गाना, राधाकृष्ण भण्डारी, उर्मिला थपलिया, रिता थापामगर, रमेश विश्वकर्मा, कृष्ण रिजाल, कविता इटनी, उर्मिला कँडेल र मधुकुमार श्रेष्ठ उम्मेदवार छन् ।
नयाँ कार्यसमितिको लागि आज मतदान हुँदैछ । निवर्तमान सभापति गगन थापाले महाधिवेशनमा कुनै गुट उपगुट नभएको प्रष्ट्याईरहँदा धादिङबाट उम्मेदवार बनेका पूर्वमन्त्री देखि कलाकारसम्म सबै आ-आफ्नो तरिकाले मत मागिरहेका छन् ।
कांग्रेसले केन्द्रीय कार्यसमितिको आकार १६७ बाट बढाएर २९७ सदस्यीय बनाएको छ । गत सोमबार संशोधित विधान पारित गरी पदाधिकारी संख्या १४ बाट बढाएर २६ पुर्याएको छ । महाधिवेशन प्रतिनिधिहरु ७ हजार ३१७ छन् ।
आज हुने मतदानमा एक जनाले २३ वटा मतपत्रमा मतदान गर्नुपर्ने छ । मतदान स्थल निर्माणमा सहभागीले दिएको जानकारी अनुसार एक जनालाई मतदान गर्न करिब ३० मिनेट लाग्ने अनुमान छ ।
