काठमाडौँ। रसुवाको भोटेकोशी बाढी प्रभावित नागरिकको राहत तथा पुनःस्थापनामा तीन वटा संस्थाबाट रु ३५ लाख ४७ हजार ५३६ सहयोग भएको छ ।
जापान नेपाल सोसाइटी (जेएनएस), नेपाल जाइका अलमनाई एसोसिएसन (जान) र समृद्धिका लागि यथायोग्य कार्यसंस्था(आइस्याप) ले स्वस्फूर्त रूपमा सङ्कलन गरेको उक्त रकम प्रधानमन्त्री दैवी प्रकोप उद्धार कोषमा जम्मा हुने गरी अर्थमन्त्री डा स्वर्णिम वाग्लेलाई हस्तान्तरण गरिएको छ ।
जापान नेपाल सोसाइटीबाट रु २२ लाख २६ हजार ५६०, नेपाल जाइका अलमनाई एसोसिएसनबाट रु १० लाख ११ हजार ७०५ र आइस्यापबाट रु तीन लाख नौ हजार २७१ सङ्कलन गरिएको प्रेस विज्ञप्तिमा उल्लेख छ ।
जानका अध्यक्ष एवं कृषि प्रवर्द्धन आयोजना नेपालका टिम लिडर डा रामचन्द्र भुसालको नेतृत्वको टोलीले उक्त रकम अर्थमन्त्री वाग्लेलाई हस्तान्तरण गरेको हो । यसअघि जानका आजीवन सदस्य एवं नेपाल सरकारका पूर्वसहसचिव लोकनाथ देवकोटाले पनि बाढीप्रभावितको सहयोगार्थ रु ५० लाख अर्थमन्त्रीलाई हस्तान्तरण गरिसक्नुभएको छ ।
बाढीपीडितलाई सहयोग जुटाएर कठिन परिस्थितिमा नेपाल सरकारलाई साथ दिएकोमा अर्थमन्त्रीले तीनवटै संस्थालाइ धन्यवाद ज्ञापन गर्नुभएको ती संस्थाद्वारा जारी विज्ञप्तिमा जनाइएको छ ।
डा भुसालका अनुसार नेपाल जाइका अलमनाई एसोसिएसन नेपाल–जापान सम्बन्ध सुमधुर बनाउन विगत पाँच दशकदेखि क्रियाशील छ । हाल जापान नेपाल सोसाइटीले आइस्यापमार्फत कृषि प्रवर्द्धन आयोजना कार्यान्वयनमा सहयोग गरिरहेको छ । ती संस्थाले विपद्मा राहत तथा पुनःस्थापनाका कार्यक्रम, सामुदायिक विकास र कृषि उत्पादन तथा बजारीकरणमार्फत ग्रामीण समुदायको आयआर्जन बढाउने कार्यमा सहकार्य गर्दै आएका छन् ।
