नेपाली फुटबलको शीर्ष डिभिजनको शहीद स्मारक ‘ए’ डिभिजन लिग एक सय २० दिनभित्र आयोजना गर्न सरोकारवालाहरू तयार भएका छन्।
सिंहदरबारस्थित युवा तथा खेलकुद मन्त्रालयमा अखिल नेपाल फुटबल संघ (एन्फा), शीर्ष डिभिजनका १४ मध्ये पाँच वटा क्लब र फुटबल खेलाडीहरूबीच भएको छलफलबाट अबको एक सय २० दिनभित्र ‘ए’ डिभिजन लिग गर्ने सहमति भएको हो।
गत कात्तिक १७ गते सातदोबाटोस्थित एन्फा कम्प्लेक्समा सम्पन्न बैठकबाट एन्फा र क्लबहरूले आगामी पुस ९ गतेबाट राष्ट्रिय लिग गर्ने र अर्को वर्षको पुस ३ गते शहीद स्मारक ‘ए’ डिभिजन लिग आयोजना गर्ने सहमति गरेका थिए।
यस वर्ष पनि लिग नहुने भएपछि गत बिहीबार एन्फामा फुटबल खेलाडीहरूले आन्दोलन गरेका थिए।
यसपछि नै एन्फाले सोमबार आफ्नै कम्प्लेक्समा खेलाडीहरूलाई बैठकमा बोलाएको थियो। तर उनीहरूले उक्त बैठक लाइभ गर्न माग गरेपछि सम्भव नभएकोले मङ्गलबारका लागि सिंहदरबारमा बैठक तय भएको हो।
युवा तथा खेलकुदमन्त्री बब्लु गुप्ताले सिंहदरबारमा मङ्गलबार बोलाएको बैठकमा १४ मध्ये तीन विभागीयसहित पाँच क्लब मात्र सहभागी भए।
सरोकार पक्षका क्लबहरू पूर्ण नभए पनि एन्फाले क्लबहरू खेल्न तयार भएमा लिग आयोजना गर्ने बताएको छ।
