धादिङ । धादिङको नीलकण्ठ नगरपालिका–४ धादिङ पौवामा सब-इन्जिनियरमाथी कुटपिट भएको छ । संघीय खानेपानी तथा ढल व्यवस्थापन कार्यालय, चितवन अन्तर्गत धादिङ शाखा कार्यालयमा कार्यरत सब-इन्जिनियर हबेन्द्र कुमार यादवमाथी कुटपिट भएको हो ।
कुटपिटका कारण सब-इन्जिनियर यादव घाइते भएका छन् । इजरा खानेपानी आयोजनाको निरीक्षणको लागि मोटरसाइकलमा जाँदै गर्दा एक व्यक्तिले मोटरसाइकल रोकी आक्रमण गरेका बताइएको छ ।
घाइतेको धादिङ अस्पतालमा प्राथमिक उपचारपछि काठमाडौंस्थित बी एन्ड बी अस्पताल रिफर गरिएको छ।
घटनामा मोटरसाइकल चालक चितवनको भरतपुर महानगरपालिका–९ निवासी सब-इन्जिनियर सुरेश आले मगरमाथि पनि आक्रमण भएको थियो।
हेल्मेट लगाएका कारण उहाँ सामान्य अवस्थामा रहेको जिल्ला प्रहरी कार्यालय धादिङका प्रहरी निरीक्षक श्याम कुमार बस्नेतले जानकारी दिनुभयो ।
पीडित पक्षले नीलकण्ठ नगरपालिका–४ निवासी ४० वर्षीय सन्जिप मल्लले कुटपिट गरेको दाबी गरेको छ।
घटनाबारे जिल्ला प्रहरी कार्यालय धादिङमा निवेदन दर्ता भइसकेको र घटनामा संलग्नहरुको खोजी भइरहेको प्रहरी निरीक्षक बस्नेतले जानकारी दिनुभयो ।
