धादिङ । कर्तव्य पालनाको सिलसिलामा कार्यक्षेत्रमा खटिएका राष्ट्रसेवक कर्मचारीहरूलाई निर्घात कुटपिट गरी फरार रहेका एक अभियुक्तलाई प्रहरीले पक्राउ गरेको छ । काठमाडौँ उपत्यका अपराध अनुसन्धान कार्यालय टेकुको समन्वयमा धादिङको नीलकण्ठ नगरपालिका वडा नं। ४ बस्ने ४० वर्षीय संजिव मल्ललाई पक्राउ गरिएको हो ।
अभियुक्त मल्लले गत जेठ २६ गते नीलकण्ठ नगरपालिका वडा नं। ४ स्थित पौवा भन्ने स्थानमा सरकारी कर्मचारीहरूमाथि आक्रमण गरेका थिए । संघीय नेपाल सरकारको खानेपानी तथा ढल व्यवस्थापन कार्यालय भरतपुरबाट खटिएका प्राविधिक टोली धादिङवेशी सह–लगानी खानेपानी आयोजना र इजारा खानेपानी आयोजनाको निर्माण कार्यको निरीक्षण तथा सुपरिवेक्षण गर्न जाने क्रममा उक्त घटना भएको जिल्ला प्रहरी कार्यालय धादिङका प्रवक्ता एवं प्रहरी नायव उपरीक्षक प्रकाश दाहालले जानकारी दिए ।
मल्लले “स्थानीय स्तरमा आफूले ढलान गरेको बाटोमा नसोधी किन प्रयोग गरेको” भन्दै उत्तेजनामा आई कर्मचारीहरूमाथि बर्बरतापूर्वक कुटपिट गरेका थिए । घटनामा चितवन भरतपुर महानगरपालिका वडा नं। ९ घर भएका ३४ वर्षीय सब–इन्जिनियर सुरेश आले मगर सामान्य घाइते भएका छन् भने सप्तरी सुरुङ्गा नगरपालिका वडा नं। २ घर भएका २९ वर्षीय सुपरभाइजर हवेन्द्र कुमार यादव गम्भीर घाइते भएका छन् ।
कुटपिटबाट सुपरभाइजर यादवको टाउको र अनुहारको भित्री तथा बाहिरी भागमा गम्भीर चोट लागेको छ । उनलाई धादिङ अस्पतालमा प्रारम्भिक उपचारपछि थप उपचारका लागि ललितपुरस्थित वि एण्ड वि अस्पताल पठाइएको र हाल सोही अस्पतालमा उपचार भइरहेको प्रहरी नायव उपरीक्षक दाहालले जानकारी दिए ।
पक्राउ परेका मल्ल विरुद्ध मुलुकी अपराध संहिता, २०७४ को परिच्छेद १४ को दफा १९४ बमोजिम उत्तेजनामा आई कुटपिट गरेको कसुरमा मुद्दा दर्ता भएको छ ।
