धादिङ । धादिङको नीलकण्ठ नगरपालिकाका छुट्टाछुट्टै स्थानबाट प्रहरीले दुई नाल अवैध भरुवा बन्दुकसहित दुई जनालाई पक्राउ गरेको छ । पक्राउ पर्नेहरूमा नीलकण्ठ नगरपालिका वडा नम्बर ११ गोलाभञ्ज्याङ बस्ने ३३ वर्षीय श्याम बहादुर शाक्य र वडा नम्बर ९ पाल्पाभञ्ज्याङ बस्ने ३२ वर्षीय सन्त बहादुर गुरुङ रहेका छन् ।
नीलकण्ठ नगरपालिका वडा नम्बर ११ स्थित बिरुडा सामुदायिक वन आसपासका क्षेत्रमा केही व्यक्तिहरूले अवैध हातहतियार लुकाईछिपाई राख्ने गरेको र बेलाबेलामा जंगली जनावरहरूको शिकार गर्ने गरेको भन्ने सूचनाका आधारमा जिल्ला प्रहरी कार्यालय धादिङको टोलीले उनीहरुलाई पक्राउ गरेको हो ।
सोमबार साँझको समयमा निगरानी तथा खानतलासी गर्ने क्रममा उनीहरूलाई हतियारसहित नियन्त्रणमा लिएको जिल्ला प्रहरी कार्यालय धादिङका प्रहरी नायव उपरीक्षक एवं् सूचना अधिकारी प्रकास दाहालले जानकारी दिनुभयो ।
प्रहरीका अनुसार शाक्यलाई सिम्ले सामुदायिक वनको बिरौटा भिरमा फायरका लागि बारुद भरी लोड गरेर लुकाईछिपाई राखेको अवस्थामा एक थान अवैध भरुवा बन्दुकसहित पक्राउ गरिएको हो । यस्तै, गुरुङले आफ्नो घरबाट साथमा लिई गई बिरुडा सामुदायिक वन नजिकैको झाडी बुट्यानमा लुकाईछिपाई राखेको अवस्थामा थप एक थान बन्दुक फेला पारिएको थियो ।
दुई नाल अवैध भरुवा बन्दुक बरामद गरी दुवै अभियुक्तलाई नियन्त्रणमा लिइएको प्रहरी नायव उपरीक्षक दाहालले जानकारी दिनुभयो । पक्राउ परेका दुवै जना विरुद्ध जिल्ला प्रहरी कार्यालय धादिङमा हातहतियार तथा खरखजाना सम्बन्धी कसुरमा मुद्दा दर्ता गरिएको छ । थप अनुसन्धानका लागि मंगलबार धादिङ जिल्ला अदालतमा पेश गरिएकोमा अदालतबाट नौ दिनको म्याद थप अनुमति प्राप्त भएको र घटनाबारे अनुसन्धान भइरहेको प्रहरी नायव उपरीक्षक दाहालले जानकारी दिनुभयो ।
ासस शैलीमा समाचार तयार गर्नुहोस् । प्रेस नोटमा उल्लेख गरिएको तथ्यहरु नबिगारिकन र बुँदाहरु नराखीकन समाचार फाइनल गर्नुहोस्
