धादिङ । धादिङ जिल्लामा वन पैदावारको अवैध चोरी–निकासी र ओसारपसारका घटनामा वर्षैपिच्छे उल्लेखनीय कमी आएको छ । स्थानीय नागरिकमा बढेको सचेतना, डिभिजन वन कार्यालयको सक्रियता र निर्माण क्षेत्रमा आएको आधुनिकताका कारण वन संरक्षणमा सकारात्मक सुधार देखिएको हो ।
डिभिजन वन कार्यालय धादिङको तथ्यांक अनुसार, विगतका वर्षहरूको तुलनामा चालु आर्थिक वर्षमा वन अपराध सम्बन्धी निकै कम मुद्दा दर्ता भएका छन् । आर्थिक वर्ष २०८०/०८१ मा १० वटा र आर्थिक वर्ष २०८१/०८२ मा ६ वटा मुद्दा दर्ता भएकोमा चालु आर्थिक वर्षको अन्त्यसम्म आइपुग्दा यो संख्या घटेर मात्र ३ मा सीमित भएको छ ।
वन पैदावारको अवैध माग र ओसारपसार घट्नुमा बहुआयामिक कारणहरू देखिएका छन् । वन क्षेत्रको नियमित गस्ती र स्थानीय समुदायको सक्रियताका कारण पनि चोरी–निकासी नियन्त्रणमा आएको डिभिजनल वन अधिकृत रोशना पोखरेलले बताउनुभयो ।
पछिल्लो समय घर तथा आवास निर्माणमा परम्परागत काठको सट्टा आल्मुनियम, फलामे डन्डी जस्ता आधुनिक र वैकल्पिक सामग्रीको प्रयोगले वन पैदावारको अवैध माग र ओसारपसार पनि घटेको डिभिजन वन कार्यालय धादिङका वन अधिकृत एवं सूचना अधिकारी दीपकप्रसाद पुडासैनीले जानकारी दिनुभयो ।
ग्रामीण क्षेत्रबाट भएको बसाइँसराइ र वन्यजन्तुको चहलपहलका कारण पनि मानिसहरू अनावश्यक रूपमा वन क्षेत्रमा प्रवेश गर्ने क्रम घटेको हो । वैकल्पिक ऊर्जाको प्रयोग र काठको विकल्पमा आधुनिक सामग्रीको आकर्षणले गर्दा वन क्षेत्रको हैसियत सुधारिनुका साथै वन्यजन्तुको प्राकृतिक वासस्थान संरक्षणमा समेत टेवा पुगेको वन अधिकृतहरुको भनाई छ ।
चालु आर्थिक वर्षमा वन पैदावार अवैध ओसारपसारमा संलग्न ७ जना पक्राउ परेका छन् । पक्राउ परेकामध्ये दुई जनाको मुद्दा फैसला भइसकेको, दुई जना अनुसन्धानको प्रक्रियामा रहेको र अन्य दुई जना तारेखमा रहेको वन कार्यालयले जनाएको छ ।
