काठमाडौं । नेपाल ‘ए’ले एकदिवसीय अभ्यास श्रृंखलामा अमेरिकालाई तीन विकेटले पराजित गरेको छ । श्रृंखलामा यो नेपाल ‘ए’को लगातार दोस्रो जित हो । घरेलु टोलीले यसअघि भएको पहिलो खेलमा स्कटल्यान्डलाई ४५ रनले पराजित गरेको थियो ।
शुक्रबार काठमाडौंको मूलपानी क्रिकेट मैदानमा अमेरिकाले प्रस्तुत गरेको २६३ रनको लक्ष्य पछ्याएको नेपाल ‘ए’ले ४९.१ ओभरमा सात विकेट गुमाएर पूरा गर्यो । नेपाल ‘ए’को जितमा मयन यादवले ७२ रनको अर्धशतकीय पारी खेले । मयनले ८० बलमा चार चौका र दुई छक्का प्रहार गरे । सन्दीप जोराले ३६ रन जोडे । कुशल मल्लले ३३ रन बनाउँदा कप्तान अनिलकुमार साहले २७ रन, पवन सराफले २४, तृतराज दासले २३, बसिर अहमले १८, र देव खनालले १७ रन बनाए ।
अमेरिकाका निम्ति मिलिन्द कुमारले दुई विकेट लिए । सौरभ नेत्रावाल्कर, नोस्तुस केन्जिगे, रुसिल उगरकार, हर्मित सिंह र सञ्जय कृष्णमूर्थीले समान एक विकेट लिए ।
