धादिङ । सदरमुकामबेसीको बीचबजारस्थित क्याम्पसचोकमा रहेको विपी पार्क पछिल्लो समय नागरिकहरूको विश्रामस्थल बनेको छ ।

बजारको भीडभाड र गर्मी छलेर सितल खोज्दै बस्न पुग्ने मानिस र विभिन्न सिलसिलामा आइपुगेका मानिसहरुको लागि पार्क आकर्षणको केन्द्र बनेको हो । वि.पी. कोइरालाको मूर्ति र आकर्षक पोखरीले पार्कको शोभा बढाएको छ ।

पार्कमा बस्नका लागि प्रतीक्षालय निर्माण गरिएको छ । दुबो लगाइएकोले चौरमा पनि मज्जाले बस्न मिल्छ । यसै कारण यहाँ बिहानदेखि बेलुकासम्म विभिन्न उमेर समूहका मानिसहरूको चहलपहल हुने गरेको छ ।

बिहानीको समयमा सरकारी कर्मचारीहरू साथीभाइलाई पर्खन र छोटो भेटघाट गर्न यो पार्कमा आउने गर्छन् । दिउँसोको समयमा बाटोमा हिँड्दा थकित भएका यात्रु तथा सर्वसाधारणहरू पार्कको शीतल छहारीमा बसेर आराम गर्छन् । बेलुकाको समयमा युवायुवतीहरू यहाँ बसेर कुराकानी गर्छन् र समय बिताउँछन् । विद्यालय र क्याम्पसका विद्यार्थीहरू समेत यहाँ आएर फोटो तथा भिडियो खिच्ने गर्छन् । साना बालबालिकाहरू पनि पार्कमा आएर खेल्ने र रमाइलो गर्ने गर्छन् ।

यो पार्क सबै उमेरका मानिसहरूका लागि साझा भेटघाट र सुस्ताउने ठाउँ बनेको स्थानीयहरु बताउँछन् । विद्यालय छुटेपछि पार्कमा भेटिनुभएका विद्यार्थी विष्णु घलेले भन्छन्, “दिनभरि विद्यालयको कक्षामा बसेर पढ्दा अल्छी र दिक्क लागेको हुन्छ । छुट्टी भएपछि यहाँ आएर साथीहरूसँग कुराकानी गर्दै चटपटे र पानीपुरी खाएर बस्न पाउँदा धेरै खुसी लाग्छ ।”

पार्कमा भेटघाट र छलफल गर्न निकै सहज वातावरण रहेको स्थानीय सर्वसाधारणहरू बताउँछन् । बाटो हिँड्दाहिँड्दै थकाइ मार्न पार्क पस्नुभएकी रीता श्रेष्ठले भन्छिन्, “बाटोमा हिँड्दा थकाइ लागेको महसुस हुँदा यहाँ आएर बस्न निकै सहज भएको छ । भेटघाट गर्न र कुनै कुराको छलफल गरेर बस्न यो ठाउँ निकै राम्रो छ ।”

पार्कमा आउने नागरिकहरूले यसको थप व्यवस्थापनमा पनि जोड दिएका छन् । पार्कमा बस्न आएका अर्का आगन्तुक रमेश थापाले भने, “पार्कमा आएर बस्दा र खानेकुरा खाँदा पानीको सुविधा तथा फोहोर व्यवस्थापनका लागि डस्बिन भए अझ राम्रो हुने थियो ।” यो पार्कलाई अझ राम्रो र आकर्षक बनाउन सके यसले बाहिरबाट धादिङबेसी आउने मानिसहरूलाई समेत आकर्षित गर्ने देखिन्छ ।

जननेता एवं साहित्यकार विपि कोइरालाको सम्पझनामा पार्क निर्माण गरिएको र यो पार्क पछिल्लो समय धेरै मानिसहरुका भेटभाट गर्ने स्थल बनेको साहित्यकार नविनबन्दु पहाडीले बताए ।