काठमाडौ । काठमाडौँको नागार्जुनस्थित ओशो तपोवनमा एक विशेष समारोहका बिच अष्टावक्र महागीतामृत (अध्यात्म तथा अद्वैत वेदान्त दर्शन) कृतिको लोकार्पण गरिएको छ ।
ओशो तपोवनद्वारा आयोजित कार्यक्रममा बोधिसत्व स्वामी आनन्द अरुण, साझा प्रकाशनका अध्यक्ष शेखर गिरी र अनुसर्जक सुमी लोहनीले संयुक्त रूपमा पुस्तक सार्वजनिक गर्नुभयो । साहित्यकार लोहनीद्वारा अनुसिर्जन गरिएको ११२ पृष्ठको उक्त कृतिलाई साझा प्रकाशनले बजारमा ल्याएको हो ।
स्वामी आनन्द अरुणले अष्टावक्र गीता जनकपुरको माटोमा जन्मिएको ग्रन्थ भएकाले यसको प्रवर्द्धनमा नेपाल बढी संवेदनशील हुनुपर्नेमा जोड दिनुभयो । राजा जनकलाई वैराग्य प्रदान गर्ने यस अनमोल ग्रन्थमा जम्मा २९८ श्लोक भए पनि यसको दार्शनिक प्रभाव असाधारण छु,उहाँले भन्नुभयो, मैले जनकपुरमा अष्टावक्र मन्दिर निर्माणको पहल गरिरहेको छु र यसलाई राष्ट्रिय कृति घोषणा गराउन निरन्तर लागिपर्नेछु ।
ओशोले सन् १९७४ मा आफ्ना साधकहरूका बिच यस दुर्लभ ग्रन्थबारे असङ्ख्य प्रवचन दिएको र ती प्रवचनहरू ६ वटा पुस्तकका रूपमा सङ्ग्रहित रहेको उहाँले स्मरण गर्नुभयो ।
अनुसर्जक सुमी लोहनीले कोरोना कालको फुर्सदमा अष्टावक्र महागीता पढेर प्रभावित भएपछि आम पाठकको लाभका लागि यसको सरल अनुसिर्जन गरेको सुनाउनुभयो । त्यस्तै, साझा प्रकाशनका अध्यक्ष शेखर गिरीले ग्रन्थको दार्शनिक ओजमाथि प्रकाश पार्नुभयो ।
लोकार्पित कृतिको समीक्षा गर्दै डा। रमा भट्टराईले आत्मबोधका सन्दर्भमा यो पुस्तक सदैव उपयोगी रहने बताउनुभयो । महिला लेखकले सिर्जना गरेको भन्दै यस्ता गम्भीर आध्यात्मिक ग्रन्थलाई उपेक्षा गर्न नमिल्ने उहाँको भनाइ थियो । अर्का वक्ता डा। अनन्त अर्यालले ध्यान र सेवाभावसहित अध्ययन गरेमा मात्र यो गीता बुझ्न सकिने धारणा राख्दै स्वामी रवि शङ्करले समेत यसको सकारात्मक चर्चा गरेको स्मरण गर्नुभयो ।
दीप प्रज्ज्वलन र स्वस्तिवाचनबाट सुरु भएको र स्वामी अर्हत्ले सञ्चालन गर्नुभएको उक्त समारोहमा विमोचित पुस्तकको मूल्य २४० रुपैयाँ तोकिएको छ।
