धादिङ । धादिङको नीलकण्ठ नगरपालिका–३, धादिङबेसीस्थित एड्भान्स एकेडेमीले २०औँ वार्षिक खेलकुद सप्ताह सुरु गरेको छ ।
खेलकुद सप्ताह उद्घाटन समारोहलाई सम्बोधन गर्दै जिल्ला खेलकुद विकास समिति धादिङका अध्यक्ष प्रतापसिंह तामाङले विद्यार्थीको सर्वाङ्गीण विकासका लागि खेलकुद आवश्याक रहेको बताउनुभयो । विद्यालय तहबाटै खेलकुदको विकास गर्न सके मात्रै दक्ष खेलाडी उत्पादन गर्न सकिने उल्लेख गर्नुभयो । तेक्वान्दोलाई पाठ्यक्रमकै रूपमा अध्यापन गराउँदै आएकोमा अध्यक्ष तामाङले एड्भान्स एकेडेमीको प्रशंसा गर्नुभयो ।
त्यस्तै, नीलकण्ठ नगरपालिका–४ का वडाध्यक्ष हरिबहादुर श्रेष्ठले खेलाडी उत्पादनको महत्वपूर्ण आधार विद्यालय भएको बताउँदै खेलकुदलाई प्राथमिकता दिएकोमा विद्यालयलाई बधाई दिनुभयो ।
विद्यालयका अध्यक्ष अर्जुन कुमार श्रेष्ठ गोर्खालीले खेलकुद सप्ताहले विद्यार्थीमा रहेको खेलप्रतिको रुचिलाई उत्साहमा बदल्दै प्रतिभा प्रस्फुटनमा सहयोग पुग्ने बताउनुभयो ।
“स्वास्थ्यका लागि खेलकुद, राष्ट्रका लागि खेलकुद” भन्ने मूल नारासहित सोमबारदेखि सुरु भएको खेलकुद सप्ताहमा प्ले ग्रुपदेखि कक्षा १० सम्मका विद्यार्थी सहभागी हुने छन् । विद्यालयका प्रिन्सिपल भीमबहादुर श्रेष्ठका अनुसार यस वर्षको खेलकुद उत्सवमा छात्र तथा छात्राका गरी १ सय १ विधामा प्रतिस्पर्धा हुनेछ । प्रतियोगितामा ३ सय ६२ स्वर्ण पदकका लागि विद्यार्थीहरूले प्रतिस्पर्धा गर्नेछन् । विद्यालयले विद्यार्थीको शारीरिक तथा मानसिक विकाससँगै अनुशासन, आत्मविश्वास र खेलभावनाको विकास गर्ने उद्देश्यले हरेक वर्ष खेलकुद सप्ताह आयोजना गर्दै आएको छ । उद्घाटन समारोहमा विद्यार्थीहरूले मार्चपास, पीटी प्रदर्शन तथा स्वागत नृत्य प्रस्तुत गरेका थिए ।
