काठमाडौँ । विश्वकप लिग-२ अन्तर्गत टियु मैदानमा जारी युएइसँगको खेलमा नेपालले युएईलाई जितका लागि २ सय १ रनको लक्ष्य प्रस्तुत गरेको छ।
टस हारेर पहिले ब्याटिङ गरेको नेपालले खराब सुरुवातका बाबजुत मध्यक्रमका ब्याटर दिपेन्द्र सिंह ऐरीले ७५ रनको इनिङ खेल्दा नेपालले मध्यम स्कोर तयार गरेको हो।
दिपेन्द्रले ९० बलको सामना गर्दै ५ चौका र २ छक्का प्रहार गरे। नेपाल ४८.२ ओभरमा २०० रनमा अलआउट भएको थियो। दीपेन्द्र बाहेक नेपालका लागि शीर्ष क्रमका कुनै पनि ब्याटरले लामो इनिङ खेल्न सकेनन्। ओपनर कुशल भुर्तेल २४ रन बनाएर आउट हुँदा आसिफ शेख ७ रनमा पेभिलियन फर्किएका थिए।
त्यस्तै भिम सार्की १० रनमा आउट हुँदा कप्तान रोहित पौडेल २ रनमा एलबिडब्लुको सिकार भए। यी बाहेक मध्यक्रम भने केही समालियो। बसिर अहमदले २० रन बनाउँदा आरिफ शेखले १५ रन बनाउँदा सोमपाल कामीले पनि १५ रन बनाए।
त्यस्तै करण केसीले २२ रन बनाएका थिए। युएईका लागि जुनाइद सिद्दीकी र अजय कुमारले ३-३ विकेट लिंदा खुजाइमा तनभिरले २ विकेट लिए। त्यस्तै हाइदर अली र मुहम्मद सहाददले १-१ विकेट हात पारे।
