धादिङ । भोटेकोशी बाढीमा परी सदस्य गुमाएका र घरबार विहिन बनेका धादिङका नागरिकहरुलाई न्यानो कपडा उपलब्ध गराइएको छ । चिसो मौसममा जाडोबाट बच्न फाइबर सिरक र न्यानो कपडा वितरण गरिएको हो ।
नीलकण्ठ नगरपालिकाका ३३ जना, सिद्धलेक गाउँपालिकाका ५ जना र ज्वालामुखी गाउँपालिकाका २ जना गरी कुल ४० जनालाई फाइबर सिरक वितरण गरिएको हो ।
त्यसैगरी, नीलकण्ठ नगरपालिका–२ तिनघरेस्थित अन्नपूर्ण आधारभूत विद्यालयमा अध्ययनरत अभिभावकबिहिन र बाढी प्रभावित बालबालिकालाई सिरक तथा ज्याकेटसमेत वितरण गरिएको छ ।
नेपाल पत्रकार महासंघ धादिङ, इन्सेक लगायत संस्थाहरुसंगको समन्वय र काठमाडौंको बानेश्वर निवासी ८२ वर्षीय भरतप्रसाद शर्मा, विष्णु तिमल्सिना, भगवान न्यौपाने र अश्वि (यमुना) शर्माको सहयोगमा उक्त सामग्री वितरण गरिएको इन्सेक प्रतिनिधि सीतराम अधिकारीले जानकारी दिनुभयो ।
बाढीका कारण परिवारका सदस्य गुमाएका तथा आर्थिक र पारिवारिक संकटमा परेका प्रभावित नागरिकले जाडो मौसममा न्यानो सिरक र कपडा पाएपछि खुसी व्यक्त गरेका छन् ।