धादिङ । धादिङ जिल्लाका स्थानीय तहहरूले नवनिर्वाचित प्रतिनिधिसभा सदस्यहरूलाई बधाई तथा शुभकामना ज्ञापन गरेका छन् ।
प्रतिनिधि सभा निर्वाचन २०८२ बाट निर्वाचित भई आएका सातै जना सांसदहरूलाई एउटै मञ्चमा निम्त्याएर पालिकाहरूले सम्मान गरेको हो ।
शुभकामना सहितको सम्मानले जिल्लाको भावी विकास र नीति निर्माणका लागि सकारात्मक सुरुवातको रूपमा हेरिएको छ । निर्वाचनका बेला भएका राजनीतिक मतभेदलाई थाती राखेर जिल्लाको हितका लागि सबै पक्ष एक ठाउँमा छन् भन्ने सन्देश दिएको धादिङ-२ बाट नवनिर्वाचित सांसद बोधनारायण श्रेष्ठले बताए ।
स्थानीय तह र संघीय सांसदबीच भावनात्मक सम्बन्ध सुमधुर बनाउन र विकासका एजेन्डाहरूमा साझा बुझाइ कायम गर्न कार्यक्रमले सहयोग पुगेको सहभागीहरुले प्रतिक्रिया दिएका छन् ।
स्थानीय सरकारले आफ्ना योजनाहरू संघीय बजेट र नीतिमा समेट्नका लागि सांसदहरूको साथ आवश्यक पर्ने हुनाले, यो कार्यक्रमले जनप्रतिनिधिहरूबीच प्रारम्भिक संवादको वातावरण तय गर्ने नीलकण्ठ नगरपालिकाका मेयर एवं नगरपालिका महासंघ नेपालका अध्यक्ष भीम प्रसाद ढुंगानाले बताए ।
स्थानीय तहका व्यावहारिक समस्याहरूलाई नीतिगत रूपमै सम्बोधन गर्नेगरी संघीय संसदमा कानुन बनाउन स्थानीय जनप्रतिनिधिहरुले सुझाव दिएका छन् । स्थानीय तहले कार्यान्वयन गर्ने र सङ्घले नीतिगत नेतृत्व लिने योजनाको ‘डुप्लिकेसन’ रोक्न र स्रोतको सही बाँडफाँटमा ध्यान दिन पनि आग्रह गरे ।
प्रत्यक्षतर्फबाट निर्वाचित सांसद बोध नारायण श्रेष्ठसहित समानुपातिक सांसदहरू बसुमाया तामाङ, गंगादेवी श्रेष्ठ, डा. पुष्पराज कँडेल, सीता थपलिया (उर्मिला), सरस्वती लामा सहभागी थिए । धादिङ क्षेत्र नं. १ बाट प्रत्यक्षतर्फ विजयी सांसद आशिका तामाङ भने सहभागी थिइनन् ।
