एनपिएलः काठमाडौँ गोर्खाजद्वारा जनकपुर बोल्ट्ससामु ११६ रनको लक्ष्य

काठमाडौँ। तेस्रो संस्करणको नेपाल प्रिमियर लिग (एनपिएल) टी-२० क्रिकेट प्रतियोगिताअन्तर्गत आजको पहिलो खेलमा काठमाडौँ गोर्खाजले जनकपुर बोल्ट्ससामु एक सय १६ रनको लक्ष्य प्रस्तुत गरेको छ ।

कीर्तिपुरस्थित त्रिभुवन अन्तरराष्ट्रिय क्रिकेट मैदानमा टस जितेर पहिला ब्याटिङ रोजेको काठमाडौँले १९ दशमलव ३ ओभरमा सबै विकेट गुमाएर एक सय १५ रन बनायो । काठमाडौँका लागि भीम सार्कीले २९ बल खेल्ने क्रममा ४ चौकासहित सर्वाधिक ३३ रन जोडे ।

यस्तै, राशिद खानले १७, स्मित पटेलले १३ र सुमित महर्जनले १० रन बनाए । बाँकी ब्याटरले दोहोरो अङ्कमा रन जोड्न सकेनन् ।

बलिङतर्फ जनकपुरका लागि राहुल यादवले चार ओभरमा ३१ रन खर्चिएर ४ विकेट लिए । यस्तै, सैफ हसनले दुई तथा कप्तान हरमित सिंह, ललितनारायण राजवंशी र मोइन अलीले एक एक विकेट लिए ।

जारी प्रतियोगितामा जनकपुर पहिलो खेलमा कर्णाली याक्ससँग पराजित भएको थियो । यस्तै काठमाडौँ आफ्नो पहिलो खेल खेलिरहेको छ । एक सय १६ रनको विजयी लक्ष्य पछ्याउने क्रममा जनकपुरले १५ ओभरमा दुई विकेट गुमाएर ९० रन बनाएको छ ।

प्रतियोगिताअन्तर्गत आजै अर्को खेल विराटनगर किङ्स र कर्णाली याक्सबीच अपरान्ह ५ः०० बजे सुरु हुनेछ । आगामी मङ्सिर ५ गतेसम्म जारी रहने यस प्रतियोगितामा आठ टोली सहभागी छन् ।