काठमाडौं । महँगी, कमजोर सार्वजनिक सेवा, शिक्षा र स्वास्थ्य क्षेत्रमा लगानीको अभाव तथा बढ्दो असमानताको विरोधमा युरोपका विभिन्न देशमा भएका प्रदर्शन हिंसात्मक बनेका छन्।
फ्रान्स र जर्मनीका प्रमुख सहरमा हजारौँ युवा सडकमा ओर्लिएका छन्। कतिपय स्थानमा प्रदर्शनकारीले पसलमा लुटपाट, तोडफोड र प्रहरीमाथि आक्रमण गरेको भनेर समाचार संस्था रोयटर्सले जनाएको छ।
जर्मनीका ३४ सहरमा हजारौँ युवाले विभिन्न माग राख्दै गरेको प्रदर्शनका क्रममा कोलोन र फ्रान्कफर्टलगायत सहरमा हिंसा भड्किएको छ ।
आयोजकहरूले प्रदर्शनमा एक लाख २० हजारभन्दा बढी युवा सहभागी भएको दाबी गरे पनि उक्त संख्याको आधिकारिक पुष्टि भएको छैन । दिनभर अधिकांश सहरमा प्रदर्शन शान्तिपूर्ण रहे पनि साँझपख विभिन्न स्थानमा झडप र तोडफोडका घटना भएका थिए ।
प्रदर्शनकारीहरूले विद्यालयको बजेट वृद्धि, महँगी नियन्त्रण, सामाजिक न्याय र जलवायु सुरक्षाको माग गरेका छन् । उनीहरूले अनिवार्य सैन्य सेवा पुनः लागु गर्ने सम्भावित योजनाको विरोधसमेत गरेका छन् ।
कोलोन र स्टुटगार्टमा अनुहार छोप्ने तथा पटाका पड्काउनेलगायत गतिविधिका कारण प्रहरीले निर्धारित र्याली रोकेको थियो । कोलोनमा सहभागीहरू राइन नदी किनारमा भेला भएर सभा जारी राखेका थिए ।
शनिबार कोलोन क्याथेड्रलनजिक करिब २०० जनाको समूहले प्रहरीमाथि बोतल र साइकल प्रहार गरेको थियो । घटनामा एकजना घाइते भएको र पाँचजनालाई पक्राउ गरिएको प्रहरीले जनाएको छ । नजिकैको गल्लीमा फ्याँकिएको विद्युतीय स्कुटरले एउटा झ्यालको सिसासमेत फुटाएको थियो ।
सहरको दक्षिणी क्षेत्रमा भएको झडपमा ‘जेनजी’ प्रदर्शनकारीबाहेक अन्य समूह पनि संलग्न थिए । कोलोनका प्रहरी प्रमुख जोहानेस हेरमान्सले हिंसात्मक गतिविधिले शान्तिपूर्ण प्रदर्शनलाई ओझेलमा पारेको बताएका छन् ।
फ्रान्कफर्टमा पसल तोडफोड, लुटपाट र प्रहरीमाथि आक्रमण भएपछि प्रहरीले सहरको प्रमुख किनमेल सडक ‘डाइ जाइल’ बन्द गरेको थियो । प्रहरीले सर्वसाधारणलाई उक्त क्षेत्रबाट बाहिरिन आग्रह गर्दै प्रवेशमा रोक लगाएको थियो ।
समाचार एजेन्सी डीपीएका अनुसार, केही व्यक्तिले पसल फोरेर जुत्ता र अन्य सामान लुटेका थिए । एउटा हतियार पसललाई समेत निसाना बनाइएको प्रहरीले जनाएको छ । प्रहरीमाथि ज्वलनशील वस्तु प्रहार भएको पनि बताइएको छ ।
हेस्सेका गृहमन्त्री रोमन पोसेकका अनुसार, फ्रान्कफर्टमा भएको झडपमा धेरै प्रहरी घाइते भएका छन् । करिब १०० अतिवामपन्थी आक्रमणकारीले बोतल, ढुंगा र पटाका प्रहार गरेको उनको दाबी छ ।
